Foreslår 1200 kroner per dekar for utsett slått

I korte trekk er forslaget frå Fylkesmannen i Rogaland slik: 

Tilskot på 150 kr per dekar for grasareal innafor området Reve-Orre i Klepp, utan andre vilkår enn at det ikkje blir spreidd mineralgjødsel eller husdyrgjødsel mellom 15.04 og 31.05.

Kompensasjon på 1500 kr per dekar  for utsett slått i økologiske funksjonsområde fram til 15.07 (evt til 01.07) for verditap av fôr.

Kompensasjon på 1200 kr per dekar for utsett slått i perioden 10.06-01.07.

Misvisane i pressa

Påstanden i fleire presseoppslag om at fylkesmannen legg beslag på om lag 2000 daa dyrka mark til svarthalespove er svært misvisande, heiter det vidare.

- Det har vi ikkje gjort, og vil heller ikkje gjere det. Det er likevel ikkje til å unngå at med ei vellukka forvalting etter føremålet med forskrifta vil dei økologiske funksjonsområda auke, og det kan bli aktuelt å utsette slåtten på større areal ein gong i framtida enn dei knapt 200 daa vi sette av i fjor, skriv Fylkesmannen.

Utgangspunktet er at forskrifta om prioritering av svarthalespove er vedteke av Kongen i statsråd i mai i fjor. «Fylkesmannen er sett til å følgje opp forskrifta. Vedtaket ligg fast, og vi må  då finne ein praktisk måte å gjere dette på. For å auke forståinga for vernetiltaka, er det viktig å møte nokon av dei motførestillingane som har kome opp i det siste», skriv Fylkesmannen.

Sterkt trua art

Artsdatabanken har fagleg vurdert bestanden av svarthalespove i Noreg til å vere "sterkt trua" (Norsk raudliste 2010). Sjølv om bestanden er større i delar av Europa, er det og ein klår tilbakegang der. Årsaka er truleg den same som på Jæren: Intensivering av jordbrukslandskapet og aukande mangel på naturleg våtmarkseng.

Fylkesmannen vonar òg å få på plass avtale om intensivert jakt på kråke, rev og mink i dei mest aktuelle hekkeområda. Dette skal minske tap av egg og ungar som skuldast desse artane. Ungar og egg som overlever slåtten er særleg utsett for rovviltangrep, fordi dei ofte vil trekke ut på dei nyslåtte engene.

Les også: - Dette er å harselere med norsk landbruk

[Les mer...]